Rusiye kontrolindeki Qırım yolbaşçısı Sergey Aksenov noyabrniñ 25-nde fiyatı 700 mln rubleden çoq (aman-aman 11 mln dollar) olğan Saq – Mamaşay (Orlovka) yolunıñ tamiri yekünlendi, dep bildirdi. Aksenovnıñ malümatına köre, yol uzunlığı 41,9 km oldı.
«Yapılğan işlerniñ keyfiyeti güzel, asfaltnıñ üst qatlarına 4 yılğa qadar hızmet kefalet müddeti berildi. Yük maşinaları tamir etilgen yollarnı ezmesin dep, 2020 senesine qadar yük kontroli alanı tiklenecek», – dep yazdı o, Facebookta.
Aksenov, Qırım qomşu Rusiye bücetinden yaqın üç yılğa yollarnıñ tamirine qoşma para alacaq, dep bildirgen edi. İlk evelâ Aqmescit, Keriç ve Aqmescit rayonınıñ yolları tamir etilecek.
Rusiyeniñ Qırım ilhaqından soñ maşina aydavcıları naqliyat tıqanıqlıqlarını muntazam sürette şikâyet ete, bunıñ sebebi Qırım yollarında yapılğan tamir işleri de ola.
