Qırımda ğayıp olğan üç yaşında Musa Suleymanovnıñ qıdırıluvını insanlar çeşit memleketlerden közete, dep bildirdi iyülniñ 25-nde Qırımtatar Milliy Meclisiniñ reisi Refat Çubarov. Video muracaatında aytqanına köre, balanı Qırımnıñ farqlı regionlarından kelgen insanlar qıdıra. Qıdıruv taqımlarını idare etken ştab açıldı, radius arttı, qıdıruv taqımları bir-birini deñiştire.
«Siyasiy mabüs Ruslan Suleymanovnıñ oğlu ğayıp oldı. Anası onı tatasınen beraber 15 daqqağa ev ögünde qaldırdı, balalar anda oynay edi. Bilesiñiz, böyle köylerde er kes bir-birini tanıy, naqliyat çoq yoq, ve balalar evleriniñ yanında oynaylar, ve, anda yat bir adam keçse, onı köreler», – dedi Çubarov.
Refat Çubarov, Musa Suleymanovnıñ qıdırıluvını köstergen er keske teşekkürler bildirip, Qırımda bala qıdırıluvını tek esas Ukrainada degil, diger memleketlerde de taqip eteler, dep qayd etti.
«Bu telâş Qırım yarımadasından uzaq yerlerge de ketti… Bütün Ukraina Musa Suleymanov ne vaqıt tapılacağını baqa. Ukraina devleti tışında – strim altındaki tefsirlerde körem, Avstraliya, İsrail, Amerika Birleşken Devletleri, Kanada ve bir çoq Avropa memleketinden baqalar, bu facia aqqında eşitken insanlar Qırımda olğanlar müsbet bitsin ve oğlançıq tapılsın, dep tileyler. İnsanlar Musa Suleymanov tez vaqıtta tapılsın dep dua etkenlerini yazalar. Ve böyle telâşlı vaqıtlarda Qırımda olıp keçkenlerge, Musa Suleymanovnıñ apansız ğayıp oluvına diqqat pek qıymetli ola», – dedi o.
Aqmescit civarındaki Mamaq köyünde üç yaşında Musa Suleymanovnı qıdırmağa devam eteler. Oğlançıq iyülniñ 24-nde coyuldı.
Daa evel berilgen malümatqa köre, balanı qıdırmaq içün Rusiye politsiyasınıñ hadimleri, kinologlar, Qırımdaki Rusiye Fevqulâde vaziyetler nazirliginiñ vekilleri ve «Liza Alert» teşkilâtınıñ göñüllileri celp etildi.
Qırım ve Aqyardaki Rusiye Tahqiqat komitetiniñ idaresi üç yaşında Musa Suleymanovnıñ iyülniñ 24-nde Aqmescit civarında Mamaq köyünde ğayıp oluvınen bağlı cinaiy dava açtı. Qırımnıñ Rusiye prokuraturası Rusiye Ceza kodeksiniñ 105-inci maddesiniñ 2-nci qısmınıñ «v» noqtasına istinaden – küçük bala öldürilüvi – cinaiy dava açtı.
