Qırımda sentâbrniñ 24-nde COVID-19 diagnozı ile üç kişi vefat etti. Bu aqta Qırımnıñ Rusiye sağlıq nazirligi haber ete.
Qayd etilgenine köre, 2513 insan tibbiy közetüv altında buluna, 429 kişi dinamik közetüv altında qala, 1985 kişi statsionarlarda qala, 99 kişi observatorlarğa alındı.
Qırım ve Aqyardaki Rospotrebnadzor idaresiniñ malümatına köre, umumen 4137 COVID-19 hastası qayd etildi. 1392 insan Qırımnıñ tibbiy müessiselerinde tedaviylene, 2635 insan tüzelgen soñ yiberildi. Epidemiya başlağanından 59 insan vefat etti.
Hatırlatamız, sentâbrniñ 24-nde Qırımda 84 koronavirus hastası qayd etildi.
Rospotrebnadzor, Qırımda koronavirus hastalarınıñ sayısı arta, dep qayd etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
