Qırımda iyünniñ 20-nde koronavirus pandemiyası sebebinden 3222 insan ekimlerniñ közetüvi altında buluna, dep bildire Qırımnıñ Rusiye Sağlıq nazirligi.
Keçken künü 302 insan közetüv altına alındı. 1997 kişi evde dinamik közetüv altında, 288 kişi hastahanede, 937 insan observatorlarda tutula, olardan 80-i keçken künü izolâtsiya etildi.
Keçken künü Qırımda 5 yañı koronavirus hastası qayd etildi. Umumen al-azırda, Qırım akimiyetiniñ malümatına köre, 595 yañı koronavirus hastası qayd etildi. 36-sı çetelden keldi, 91 kişi qomşu Rusiyeden kelgen ve olarnen alâqada olğanlar. 397 insan yahşı oldı, 20 koronavirus hastası vefat etti. Yılnıñ başından Aqyarda 200 insan koronavirus yuqunçına oğradı. Al-azırda 25 kişi hastahanede buluna. 165 kişi tüzeldi, 3 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
