İyülniñ 2-nde üyleden soñ ve iyülniñ 3-nde künniñ birinci yarısında Qırımnıñ özenlerinde suv seviyesi bir buçuq metrge köterilecektir. Bu aqta Qırımnıñ Rusiye Fevqulâde vaziyetler nazirligi haber ete.
Qurtarıcılarnıñ tevsiyeleri bar: şahsiy naqliyatnen sıñırlı çıqmaq, mümkün olsa, evde qalmaq, telükesizlik qaidelerine riayet etmek, alçaq yerlerge barmamaq ve köpürlerden keçmemek, özenlerni keçüvnen bağlı ekstremal sport çeşitlerinen oğraşmamaq.
Qurtarıcılar vatandaşlardan dağ ve ormanlarğa çıqmamalarını, şahsiy ev ve yazlıq topraq damartılarınıñ saiplerinden drenaj sistemalarını temizlemelerini rica ete.
Qırımda cumaaqşamı künü, iyülniñ 2-nde, boranlı yağmur, küçlü yağmur ve burçaq yağması beklenile. Tahmin etilgen yaramay ava sebebinden Qırımnıñ Fevqulâde vaziyetler nazirliginiñ idaresi yarımada sakinlerini ve musafirlerini deñizge çıqmamağa, furtuna vaqtında yalı kenarı yaqınlarında olmağa çağıra.
Yarımadada eki aftadan berli yaramay ava qala. Aqmescit soqaqlarını eki kere suv bastı. Aqyarnıñ Kazaçya körfezinde küçlü yağanaqlar neticesinde topraq eşildi. Ekologlarnıñ ilk esaplarına köre, umumen 500 tonna topraq eşildi.
Aqmescit rayonınıñ Biy Tanış (Pervomayskoye) köyünde 50 evni suv bastı.
