Qırımda qurğaqlıq sebebinden kütleviy şekilde özenler saylaşa, dep haber ete Qırım.Aqiqat mühbiri.
Onıñ sözlerine köre, Alma, Qara ve Belbek özenleriniñ yuqarı qısımları quruy. Aluşta, Sudaq ve Kefe belediye rayonlarınıñ özen havuzlarındaki özenlerniñ yuqarı qısımları qurumağa devam ete.
Qırımnıñ esas özeni Salğırğa Aqmescit suv anbarından suv kelmey. Sebep suv paytahtnıñ ihtiyacalarına kerek ve onı tutumlı qullanalar.
Salğır özenine qoşulğan Kiçik Salğır özeninde suv azlaştı.
Saylaşqan Qarasuvbazar suv anbarından artıq suv almağan Büyük Qarasu özeni de aman-aman qurıp ketecek.
Qarasuvbazardaki Sarı Su özeni bütünley qurudı, onıñ yatağını ot bastı.
Evel yerli sakinler Qırım.Aqiqatqa Qarasuvbazar suv anbarından suv kettikçe azlaşqanı aqqında bildirgen ediler. Sebep avgust ayındaki sıcaqlıqtır ve Kahovka suv elektrik stantsiyasınıñ yoq etilmesinde soñ suvsız qalğan Şimal-Qırım kanalını toldurmaq içün suv anbarından Büyük-Qarasu özenine suvnıñ aqtarılmasıdır.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri.
Rusiye tayin etken Qırım yolbaşçısı Sergey Aksönov Qırımnıñ iç ihtiyacları içün yeterli qadar suv olğanını ayta.Aynı zamanda onıñ sözlerine köre, Şimal Qırım kanalında suvnıñ seviyesi kettikçe eksile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
