Qırımnıñ Rusiye akimiyeti Qırımğa kelip özüni tecrit etmegenlerni observatorğa yatqızmağa qarar aldı. Bu aqta Moskva kontrolindeki Qırım yolbaşçısı Sergey Aksenovnıñ aprelniñ 5-nde derc etilgen buyruğında aytıla.
«Rusiye Federatsiyasına qaytqan ve Qırım Cumhuriyetine kelgen vatandaşlarnıñ yaşağan yerlerinde qaytqan kününden 14 kün devamında özüni tecrit etmelerini temin etmek. Yaşağan (bulunğan) yerinde özüni tecrit etmege çare olmasa, böyle vatandaşlar observatorda tibbiy közetüv altında qalmalı», – dep aytıla fermanda.
Daa evel berilgen malümatqa köre, Qırımda keçken künü özüni tecrit etüv rejiminiñ bozuluvı sebebinden 87 protokol tizildi. Eñ çoq bozuv Yalta, Aluşta ve Kezlevde qayd etile.
Daa evel berilgen malümatqa köre, Qırımda koronavirusnen hastalanğan ve özüni tecrit etüv rejimini bozğan yerli sakinge qarşı ilk cinaiy dava açıldı. Qırımlınıñ advokatı qabaatını inkâr ete ve mahkemege muracaat etmege niyetlene.
Rusiye politsiya hadimleri, özüni tecrit etüv rejimini bozıp, öz maşinasınen plâjğa barğan 37 yaşında Kefe sakinini de observatorğa yolladı.
Aprelniñ 5-nde saba işğal edilgen Qırımda 2974 insan tibbiy közetüv altında, 2886-sı dinamik közetüvde qala. 66 insan hastahanede, 22 insan observatorda buluna. Qırımda 20 koronavirus yuqunçı hastası qayd etildi, 6 tüzelgen hasta hastahaneden çıkarıldı. Aqyarda 5 kişi koronavirusqa oğradı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
