Qırımda koronavirus yuqunçınıñ tarqaluv telükesi sebebinden özüni tecrit etüv rejimi aprelniñ 30-na qadar uzatıldı. Qırımnıñ Rusiye yolbaşçısı Sergey Aksenovnıñ buyruğı ükümet portalında derc etildi.
«2020 senesi aprelniñ 3-nden 30-na qadar vatandaşlarnı yaşağan yerlerinden ayrılmamalarına mecbur etmek, acele tibbiy yardım ve ayat ve sağlıq telükesi istisna ola», – dep aytıla vesiqada.
Buyruqta qayd etilgenine köre, sıñırlavlar acele hızmet hadimlerine, Rospotrebnadzor hadimlerine, göñülli ve cemaat telükesizligini temin etken diger insanlarğa tesir etmey. Sıñırlavlar vaqtında vatandaşlarğa tuvğanlarını, ihtiyacı olğanlarnı baqmaq içün evden çıqmağa, tükânğa barmaq ve çöplük çıqarmaq, yaşağan yerinden 100 metr mesafede ev ayvanlarını çıqarmaq içün evden çıqmalarına izin berile.
Sıñırlavlar müvekkilerini qoruması kerek olğan advokatlarğa ve işke baracaq olğanlarğa tesir etmey.
Aprelniñ 5-nde saba işğal edilgen Qırımda 2974 insan tibbiy közetüv altında, 2886-sı dinamik közetüvde qala. 66 insan hastahanede, 22 insan observatorda buluna. Qırımda 20 koronavirus yuqunçı hastası qayd etildi, 6 tüzelgen hasta hastahaneden çıkarıldı. Aqyarda 5 kişi koronavirusqa oğradı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
