Aqmescit rayonınıñ Azat (Storojevoye) köyü yanında yol qazasında Peugeot 406 maşnasınıñ yolcusı elâk oldı.
Rusiye İİN-niñ qırım idaresi bildirgeni kibi, yengil ve yük maşnalarnıñ çatışması noyabr 4-ünde oldı.
"Yengil maşna aydavcısınıñ çeşit-türlü yara ve ezikleri bar, onı "qapalı baş travması, miy sarsıntısı, belkemikniñ boyun bölüginiñ qırığı" ilk diagnozınen hastahanege qoydılar", - denile beyanatta.
Poliske köre, Peugeot 406 maşnasınıñ aydavcısı, Aqmescit rayonında "Yañı Qapı (Krasnoperekopsk) - Aqmescit" yoluna taraf ketkende, Aqmescitten Yañı Qapığa taba baş yoldan ketken KamAZ maşnasına yol bermedi.
Qurtarıcılar Qırımda ciddiy yol qazalarınıñ sayısı arttı, dep bildirgen edi. Qırımda 2019 senesiniñ ilk üç ayında keçken senege baqqanda bir buçuq qat ziyade aydavcı mesüliyetke çekildi.
