Rusiye nezaretindeki Qırım başı Sergey Aksönov, yarımada askinleri suv keyfiyetine şikâyet etkenini bildidre. Çeşmelerden ne içmekke, ne de qullanmaqqa lâyıq olmağan suv kele.
Bunı Aksönov sentâbr 11-inde Aqmescit şeeriniñ, Aqmescit ve Bağçasaray rayonlarınıñ suv teminatı boyunca muşaverede ayttı.
"Bütün Qırımdan muracaatlar kele. Esas şikâyetler suvnıñ keyfiyeti, suvnıñ bulançıq olğanı, içmekke ve qullanuvğa yaramağanı ile bağlı. Suv berüv cedvellerine ve yuqarı qatlarda suvnıñ olmamasına da şikâyet eteler", - dedi Aksönov.
"Voda Krıma" müessisesiniñ başı Vladimir Bajenov, "borularda suv qarışqanı ve bunıñ içün bütün kir köterilgeninen" bağlı olğanınen añlata.
Aksönov muşaverede şirketlerge borularnı temizlemege buyurdı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
