Kreml nezaretinde olğan Qırımnıñ İçki rayon mahkemesi Enver Topçige qarşı “çaqmama davası” boyunca delillerni baqmağa devam etti. Bunı Qırım.Aqiqat mühbiri haber ete.
Mahkme oturışında, mudafaa tarafı taqdim etken alternativ ekspertizanıñ neticeleri baqıldı.
“Bugunki mahkeme oturışında mudfaa tarafı davet etken ve qabaatlav tarafı yapqan ekspertizanıñ neticelerini tam şekilde red etken bir mütehassısnı sorğuğa çektik. Ve bugün mütehassıs yazışmada Enver Topçi kimnen qonuşqanını ve şu insan bir de bir cinayet etkenini bilip olamağanını tasdıqladı. Bunıñ esasında daa bir ekspertiza keçirilgenini istedim, amma mahkeme bunı red etti”, - dep aytı advokat Emil Kurbedinov.
Bundan ğayrı mudafaa tarafı, Enver Topçiniñ dava materiallarına qoşulğan Ümicon Dadaconov davası boyunca lingvistik ekspertizanıñ çıqarılması içün muracaat etildi.
Avgustnıñ 31-nde Rusiye quvetçileri Sudaq, İçki ve Seyitler rayonlarında Enver Topçi, Ayder Ablâkimov, Ridvan Umerov ve Ayder Kadırovnıñ evinde tintüv keçirdi.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña köre 100 biñ rublege qadar para cezası, 1 yılğa qadar mecburiy işler ya da aynı müddetke apis cezası berile bile.
Mabüsler uquq qoruyıcı organlarına Umicon Dadajonov ile içtimaiy ağlarda yazışqanını bildirmegeninde qabaatlana. O, FSB bildirgenine köre, «Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken edi».
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
