Qırımdaki Rusiye mahkemesi vatandaş jurnalisti ve emşire İrına Danılovıçnı yedi yılğa azatlıqtan marum etti. Daa evel mahkemede qadın Rusiye quvetçileri tarafından tutulğan soñ işkencege oğratıldı, dep bildirgen edi. Danılovıç emşire olıp çalıştı, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi. Qırım.Aqiqat İrına Danılovıçnıñ mahkemedeki soñki sözüni derc ete.
FSB hadimleriniñ sustırmaq ve apis etmek içün pis usullar qullanğanı ilk kişi men degilim. Amma kerçek böyledir: biz basqılar, total tsinizm, ekiyüzlülik ve yalan devrinde yaşaymız.
Amma kerçek böyledir: biz basqılar, total tsinizm, ekiyüzlülik ve yalan devrinde yaşaymız
Yüzü ve adı olmağan, sıñırsız quvetine ve cezasızlığına emin olğan kişiler adamlarnı qaçıralar, qanunsız şekilde apis eteler, ikencelerge oğratalar, evlerinde yağmacılıq yapalar. Soñra ise öz canavrlıqlarını gizlemek ya da aqlamaq içün bu insanlarğa qarşı cinayet davalarını açalar, olarnıñ şahsiy eşyalarına ya da evlerine patlayıcı maddeler, narkotik ya daa bir şeyler taşlaylar. Bu davadaki sahte tahqiqat ise sırf qabaatlav taarfınıñ faydasına çalışa. Obyektiv er taraflama tahqiqat keçirmekten red eteler.
Mahkeme aqqımda qabaatlav qararını çıqarmadan evel men bu adlarnı mahkemege hatırlatmaq isteim – keçken mahkeme oturışında biz olarnı artıq hatırlağan edik, amma tekrar etecegim - Rizvan Abduramanov, Marsel Alâutdinov, Eskender Apselâmov, Arsen Suyunov, Şevket Aripov, İvan Bondarets, Valeriy Vaşçük, Maksim Kapliyenko, Fedor Köstenko, Yekaterina Klapova, Vasiliy Çernış, Arsen Aliyev, Muhtar Arislanov, Ruslan Geniyev, İslâm Cepparov, Seyran Zinedinov, Ervin İbragimov, Cevdet İslâmov, Arlen Terehov, Timur Şeymardanov, Reşat Ametov.
Bu insanlarnıñ episi menim kibi soñki sekiz yıl devamında qaçırıldı. Amma olar alâ daa tapılmadılar, farq bu.
Reşat Ametov 2014 senesi mart ayında qaçırıldı, aqrabaları onı eki afta qıdırdılar. Qanun qoruyıcı organları degil, aqrabaları qıdırdı. Reşatnıñ cesedi Qarasuvbazar rayonında başı skotçnen bağlanğan, közleri oyıp çıqarılğan alda tapılğan edi. Bütün bedeni kesilgen, qolları ve ayaqlarında qara qırmalar bar edi.
Seyran Zinedinov 2014 senesi mayıs ayında qaçırıldı. Timur Şaymardanovnıñ apayınen körüşken soñ evge beş yüz met barıp çıqmadı. Çünki o Şaymardanovnı qıdıra edi. Timur bundan dört kün evel qaçırıldı. Seyrannıñ qaçırılmasını AZS kamerası qayd etti, qanun qoruyıcı organları onı da qıdırmadı.
Ervin İbragimov 2016 senesi mayıs ayında qaçırıldı. Onıñ qaçırılmasını telükesizlik kameraları qayd etti. Ana-babası qaçırıluv ile bağlı tahqiqat keçirilmesini bayağı vaqıt istedi, amma 2017 senesi tahqiqat qapatıldı.
İslâm Cepparov ve Cevdet İslâmov 2014 senesi sentâbr ayında qaçırıldı. Olarnı qaçırğan adamlar Ervin İbragimovnıñ qaçırılğanı maşnada ediler. Qaçırıluv aqqında Tahqiqat komitetine bildirgen şaat iskencelerge oğratıldı, soñra oña qarşı cinayet davası açıldı. Şimdi o adam apishanededir.
Meni qaçırğan FSB hadimleri mende aslında ne taptılar? Aqiqat ve şahsiy fikrimni
Men de iskencelerge oğratıldım. FSB binasınıñ mağazında tutulğanda men de bu cedvelde olacağımda emin edim. İç şübem yoq edi.
Meni qaçırğan FSB hadimleri mende aslında ne taptılar? Aqiqat ve şahsiy fikrimni. Devlet maşnasına ve yalanğa qarşı eñ küçlü, eñ telükeli silâ aqiqattır.
Meni qaçırğanları künü bu futbolkanı ilk sefer kiygen edim. Simvolik oldı. Bu futbolka üstünde şimdi Qırımda yüz bergenler aqqında yazılğan. Futbolka üstünde "Azatlıq qulluqtır, caillik quvettir" yazılğan. Qırımnıñ şimdiki vaziyeti budır. Mahkemege de bu futbolkanı kiyip keldim.
Futbolka üstünde "Azatlıq qulluqtır, caillik quvettir" yazılğan
Totalitar rejimine açıqça aqiqatnı aytqan adamlar kerek degil, bunı artıq defalarca kördik. Esasen apishaneler şimdi böyle adamlarnen tolu. Rejim olarğa qarşı turıp olamacağını köre, şunıñ içün olarnı tuta, apis ete. Birilerni qorqutıp olamağan akimiyet, başqalardan açuvını çıqara.
Basqıcı maşna tek meni degil, amma başqalarnı da sustırmaq içün meni er kes ögünde mahkeme ettiler. Eger bu sekiz yıl içinde daa qorqmağanlar olsa, olarnı da qorqutmaq içün. Amma bu mahkemeniñ effekti başqa olacaq. Soñki sekiz yıl devamında qorqu içinde yaşağanlar öyle de qorqu içinde yaşmağa devam etecekler. Qorqmağanlarnı olar qorqutıp olamazlar. Şimdi ise bütün insanlar Qırımda yüz bergen vaqialar aqqında aqiqatnı bileler.
Meni mında pek çoq adam bile, ve olarnı buña iç bir vaqıt inanmazlar
Meni mında pek çoq adam bile, ve olar buña iç bir vaqıt inanmazlar. Ve bu adamlar Qırımda yañı apishaneler kim içün qurulğanını bilecekler. Ne içün hastahaneler, mektepler ve bala bağçaları degil de, apishaneler qurulğanını bilecekler.
Bütün bu qanunsızlıqlar tezden bitecegine inanam. Men ve daa yüzlernen suçsuz adamlar azat olacaq, cinayetçiler ise apis etilecek. Qırım yaşamaq içün azat ve telükesiz yerge kene çevirilecek.
İrına Danılovıç, faal, vatandaş jurnalisti
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.