Qırımtatar asıllı ukrayin yırcısı Jamala 2024 senesi Taras Şevçenko adına Milliy mukâfatınıñ laureatı oldı. Bu aqta Ukrayina prezidentiniñ saytında aytıla.
Yırcı Qırım folklor albomı içün mukâfatqa nail oldı.
Vesiqağa binaen, mukâfatnıñ miqdarı bu sene 429 biñ grivna olacaqtır.
Taras Şevçenko adına Ukrayina milliy mukâfatı ya da Şevçenko mukâfatı 1961 senesi tesis etilgen Ukrayina devlet mukâfatı. Memleketniñ medeniyeti ve sanatınıñ inkişafına büyük isse qoşqanı içün berile.
Bir insan ömründe bir kere mukâfat ala bile. Mukâfatnı mahsus komitetniñ qararı esasında Ukrayina prezidenti bere.
Jamala QIRIM albomını keçken sene mayısnıñ 5-nde taqdim etti. Oña er biri Qırımnıñ belli bir yerini temsil etken 14 kompozitsiya ve OUTRO-nıñ 15-inci treki kirdi. Jamalanıñ bütün eserlerini on yıllar devamında Qırım yarımadasınıñ çeşit köşelerinden toplay edi. Bu albomnıñ işinde 80-den ziyade çalğıcı iştirak etti.
Daa evel Jamala Spotify yayınlav platformasınıñ EQUAL leyhasınıñ eñ populâr üç icracısı sırasına kirdi. Bu aqta o Facebookta bildirdi.
Jamala 2014 senesi Qırım ilhaqını ve Rusiyeniñ Ukrayinağa istilâsını açıq sürette takbih etti. 2016 senesi o, qırımtatarlarnıñ sürgünligi aqqında ''1944'' yırınen "Eurovision" yarışında ğalebe qazandı.
Noyabrniñ 29-nda Moskva mahkemesi, RF ordusına qarşı "sahte dava" boyunca Camalanı ğıyabiy şekilde apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
