Refat Çubarov, «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası mayısnıñ 2-nde keçirilecek, dep ilân etti. Yürüş vaqtında faaller işğal etilgen Qırımğa memuriy sıñırdan keçip kirmege niyetlene. Qırımnıñ Rusiye akimiyeti buña qorquzuvlarnen cevap berdi. Al-azırda planlaştırılğan aktsiya aqqında neler belli – Qırım.Aqiqatnıñ maqalesinde tarif etile.

Refat Çubarovnıñ qayd etkenine köre, ilk sıralarda Meclis azaları, halq deputatları ketecek. «Menlik yürüşiniñ» teşkilâtçıları halqara teşkilâtlarnıñ vekillerini de davet etmege planlaştıra. Çubarov, işğal etilgen yarımadağa küç qullanıp kire bileceklerini inkâr etmey.

«Rusiye bütün imkânlarını qullanıp, qırımtatarlarnı olarnıñ toprağından quvacaq ola. Qırımtatarlar içün, belki de, 1944 senesiniñ sürgünliginden berli ilk sefer kerçek bir telüke bar», – dep bildirdi siyasetçi.

Refat Çubarov Qırım.Aqiqatqa izaat berip, keçirilmesi mayısnıñ 2-ne ilân etilgen işğal etilgen Qırımğa taba yürüş Ukraina akimiyetinden razılıq almasını talap etmey, çünki aktsiya, Çubarovnıñ aytqanına köre, qanunğa uyğun ola, dep bildirdi.

«Bizim fikirlerimiz açıq edi, teşebbüs 2019 senesi dekabr ayında ilân etildi. O vaqıt künni daa aytmadıq, tünevin ise aydınlattıq. Akimiyet organları şimdilik seslenmedi. Bu bizim aktsiyamızdır. Ukraina qanunlarına köre, qanunğa uyğun aktsiyalar keçirilecek olsa, razılıq almağa kerekmey», – dep qayd etti Çubarov. Teşkilâtçılar aktsiya tafsilâtlarını aytmay.

Aynı vaqıtta, Qırımtatar Milliy Meclisiniñ reisi Qırım yürüşiniñ teşkilâtçıları yapqan areketlerini Ukraina akimiyetinen keliştirmege «tırışacaqlar», dep haber etti.

«Biz Ukraina qanunlarına köre aqlarımıznıñ seviyesini bozmaycaqmız. Bu aktsiyanı kerçekleştirmek içün atılacaq bütün adımlarnı ştabımıznen beraber belli hızmetlernen keliştirmege tırışacaqmız. Ukraina devlet qurulışlarınıñ faaliyetini zorlaştırmaq kibi bir niyetimiz yoq. Ya da, Allah saqlasın, Ukraina devletiniñ ortaqlarınen munasebetlerini qıyınlaştırmağa istemeymiz», – dedi Çubarov.

Aynı vaqıtta, Qırımtatar Milliy Meclisiniñ reis muavini İlmi Umerov yapılacaq areketlerni keliştirmege «kerek yoq», dep ayttı.

«Mence, (yürüşni – QA) Ukraina sıñır hızmetinen keliştirmege acet yoq, çünki bu Ukraina toprağı, biz öz toprağımızğa ketemiz», – dep ayttı Umerov.

Ukraina Devlet sıñır hızmetiniñ Qırım.Aqiqatqa bildirgenine köre, müessiseniñ mayısnıñ 2-ne keçirilmesi ilân etilgen Qırım yürüşiniñ işgtirakçilerine keder etmek içün sebep yoq.

«Qanunlar çerçivesinde resmiyleştirmek kerek. Qanunlarda işğal etilgen Qırımnıñ memuriy sıñırını keçüv tertibi belgilengen. Keder etmek içün sebep yoq», – dep bildirdi Ukrainanıñ işbirligi meseleleri bölüginiñ reberi Andrey Demçenko.

Aksenovnıñ «sert qarşılığı» ve Poklonskayanınh avtozakları

Rusiye kontrolindeki Qırım yolbaşçısı Sergey Aksenov Refat Çubarovnıñ keçirilmesi mayısnıñ 2-ne ilân etilgen Qırım yarımadasına taba yürüş aqqında malümatını provokatsiya dep adlandırdı. Aksenovnıñ aytqanına köre, bu tedbirniñ iştirakçilerini «sert qarşılıq» bekley.

«Sıñırdan qanunsız keçüv areketleri, Rusiyege kirüv ıntıluvları olsa, böyle areketler, şübhesiz, sert ve qanunğa köre qarşılıq alacaq. Ukraina aikmiyeti provokatsiyanıñ aqibetlerini tüşünmeli», – dep yazdı Aksenov Facebookta.

İşğal etilgen Qırımnıñ sabıq prokurorı, Rusiye Devlet dumasınıñ deputatı Natalya Poklonskaya da Çubarovnıñ malümatına cevap berip, Qırımda yürüş iştirakçilerini Rusiye quvetçileriniñ avtozakları bekleycek, dep bildirdi.

«Biz sizni bekleycekmiz. «Büyük» Qırım yürüşinden soñ yarımada boyunca avtoyürüş de yapa bilemiz. Bunıñ içün bayram avtozaklarını da berirmiz», – dep yazdı Poklonskaya Facebook saifesinde.

«Qırımtatarlarnı qorquzıp olamazsıñız»

Qırımtatar halqınıñ lideri, Ukraina Yuqarı Radasınıñ deputatı Mustafa Cemilev Natalya Poklonskayanıñ aytqanlarını Qırım.Aqiqatqa izaatlap, «qırımtatarlarnı avtozaklarnen qorquzamazsıñ», dep ayttı.

«Aydut devletnen qarşılaşqanımız içün kimse telükesizlikni kefil etip olamay. Qırımtatarlar avtozaklarğa alıştı, bizni qorquzamazsıñız», – dedi Cemilev.

Qırımtatar halqınıñ lideri mayısnıñ 2-nde keçirilecek Qırım yürüşinde iştirak etecek, dep ayttı. O, yürüşniñ birinci sıralarında ketmege azır olğanını bildirdi. Cemilev, Rusiye tarafından küç qullanıla bile, dep ayta.

«Rusiye ne deycekmi? Bir qaç variantımız bar. Şunıñ içün ilk sıralarğa acımağan soylarımıznı yollaycaqmız. 73 yaşından büyük olğanlarnı acımaymız (76 yaşında Mustafa Cemilev aqqında aytıla – QA). Ne içün 73 yaşından büyük olmalımı? Çünki 73 yaş – Ukrainada ömürniñ orta uzunlığıdır», – dedi Cemilev.

Qırımtatar Milliy Meclisiniñ reisi Refat Çubarov Qırım.Aqiqatqa izaat berip, Qırımnıñ Rusiye akimiyetiniñ keçirilüvi planlaştırılğan yürüşke bergen cevabını «yayğara» dep adlandırdı.

«Qırımnı zapt etkenler bu topraq bizge ait olmağanını ayta. Olar tek qabul etmemek degil, bastırmaq içün Moskvanı eñ sert tedbir almasına çağıracaqlar», – dep tüşüne Çubarov.

2019 senesi dekabrniñ 6-nda Çubarov esas Ukrainadan Rusiye işğal etken Qırımğa taba yürüş keçirilecek ve azırlıq başladı, dep ilân etti. Çubarovnıñ bildirgenine köre, belli mesleatlardan soñ erkânı aydınlatılacaq ştab endi quruldı.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.