İvano-Frankivsk şeer şurasınıñ binasında "Qırım ve Karpatı. Ananeler ve zemane" multimedia leyhasınıñ açılışı olıp keçti. Bu leyha ressam-çölkmekçi Serğiy Dutka ve qırımtatar ressamı Tenzile Topalovanıñ eserlerini birleştirdi.
Ukrayina medeniy fondunıñ desteginen meydanğa ketirilgen leyha eki bölge arasındaki bediiy dialog olaraq taqdim etile, bu leyhada Karpatı ve Qırım aqqında eserler birlik ve ğayrıdan tiklenüvni timsal eteler, dep qayd etile İvano-Frankivsk vilâyet devlet idaresiniñ beyanatında.
Ekspozisiyanıñ esas mevzusı, tuvğan toprağından ayırılğan qırımtatar kimliginiñ saqlanuvı oldı. Ressam Tenzile Topalova resimlerni öz halqı aqqında hatıra ve ikâyelerni saqlamaq içün bir vasta olaraq qullana, denile beyanatta.
"Men Qırımda doğdım... Bugün, Vatanımdan ayırılğanım, "Qırım" sözüni büyük keder ile aytam, amma, aynı zamanda, büyük sevgi ile, onı öz icadıma çevirem. Keten ve yağlı boyalar — halqımnıñ hatırasını ve ikâyelerini dünyağa bildirmek içün saylağanım tildir... Bizni sessiz qaldırmağa tırışqanlarına baqmadan biz laf etemiz", — dedi Tenzile Topalova.
Onıñ aytqanına köre, leyhanıñ emiyeti şunda ki, o, eki farqlı halqnıñ öz kimliklerini saqlamaq içün umumiy küreşke birleşkenini köstere.
"Bu leyhanıñ müimligi, birinciden, farqlı olğanımıznı, amma aynı zamanda umumiy maqsatnen, öz kimligimiz, azatlıq ve adaletniñ ğayrıdan tiklenüvi içün umumiy küreşnen birleştirilgenimizni köstere", — dep qayd etti ressam.
Ananeviy kosiv keramikasınen çalışqan çölmekçi Serğiy Dutka, bu kibi leyhalar hususiy qıymetke saip olğanını qayd etti, çünki "duşman asırlar devamında yoq etmege tırışqan" medeniyetniñ zenginligi ve çeşitligine diqqat ayıra.
Sergi 10 kün devamında ziyaretçiler içün açıq olacaq, soñra Ukrayinanıñ diger şeerlerine ve çetelge yol alacaq. Bundan soñra daimiy şekilde saqlanmaq içün Kosiv Karpatı medeniyet merkezine berilecek.
