2020 senesi aprelniñ 3-ne qadar Qırım ve Herson vilâyetiniñ kontrol noqtalarında keçiş sıñırlandı. Bu aqta martnıñ 17-nde Ukrainanıñ vaqtınca işğal etilgen topraqlar ve vaqtınca memleket içinde köçip kelgenler meseleleri nazirligi bildire.
Nazirlikniñ bildirgenine köre, vaqtınca kirsetilgen tedbirler «milliy menfaatlarnı qorumaq ya da halqara vazifelerni yerine ketirmek maqsadınen memuriy sıñırdan keçken şahıslar, Ukraina vatandaşları ve qorantalarınıñ azaları, em de Qırım ve Aqyardan çıqqan diplomatik ve gumanitar missiyalarnıñ vekillerinden» ğayrı, er keske tesir etecektir.
«Diger çetel vatandaşları ve vatandaşlıqsız şahıslar Vaqtınca işğal etilgen topraqlarnıñ reintegratsiyası meseleleri nazirliginiñ Ukraina Devlet sıñır hızmeti memuriyetinen kelişken soñ kire ve çıqa bileler», – dep aytıla haberde.
Nazirlikniñ qayd etkenine köre, «keçiş noqtalarınıñ vaqtınca qapatıluvı hastalanğan Ukraina vatandaşlarınıñ kelişini eksiltmeknen beraber olarnı qorumağa da imkân berir».
Ukraina İç işler naziri Arsen Avakov, işğal etilmegen esas Ukrainada qayd olmağan ukrainalılarnı Donbastaki kontrol keçiş noqtalarından ve işğal etilgen Qırımnıñ memuriy sıñırından keçirmemege teklif ete.
Ukraina aq qorçalayıcıları bu ğayeni takbih ete.
Kreml kontrolindeki Qırım akimiyeti dünyada tarqalğan koronavirus telükesi sebebinden Herson vilâyetiniñ memuriy sıñırındaki keçiş noqtasını qapatmağa teklif ete.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlana. Aqyarda martnıñ 19-ndan başlap bütün mektepler qapatıla, aliy oquv yurtları ise martnıñ 16-nda uzaqtan tasilge keçti.
Qırımda koronavirus qayd etilgen memleketlerden kelgenler içün tevsiyeler çıqarıldı.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
