Mayısnıñ 2-nde bazarertesi künü Qırım ve dünya musulmanları İslâmda eki esas bayramdan birini - muqaddes Ramazan ayınıñ soñuna kelmesini bildirgen Oraza bayramını qayd eteler.
Oraza bayramı 30 kün devam etken orazadan soñ üç kün devam ete ve Qurban bayramından soñ musulmanlarnıñ ekinci eñ müim bayramıdır.
"Qırımtatar Milliy Meclisi adından ve şahsen öz adımdan Ukrayinanıñ bütün musulman vatandaşlarını orazanıñ bitmesi ve Ramazan bayramı munasebeti ile hayırlayım. Yüce Allah Ukrayina devletini mudafaa etmek ve yaqın keledejkte Ukrayinanıñ RF tarafından işğal etilgen bütün topraqlarını, şu cümleden Qırımnı da azat etmek içün quvet bersin", - dep yazdı Refat Çubarov Facebookta.
O hatırlattı ki, Ukrayina musulmanları bütün diger vatandaşları ile beraber Ukrayina devletini Rusiye tecavuzından mudafaa eteler.
"Ukrayina silâlı quvetleriniñ Rusiye işğalcilerine qaramancasına cevap bermesi, Ukrayina halqınıñ yüksek ahlâqiy ruhu ve birligi, Ukrayinağa misli olmağan halqara konsolidatsiya ve destek RF işğal etken Qırım sakinleriniñ ekseriyetiniñ - tamır qırımtatar halqınıñ, qavmiy ukrayinlerniñ ve diger milletlerniñ ümütlerini quvetlendirdi", - dep qayd etti o.
Qırımtatar halqınıñ lideri Mustafa Cemilev onı işğalde qarşılağan musulmanlarnı bayram munasebeti ile hayırladı.
"Aziz semetdeşler, musulman taqviminde bugün büyük bayram - Oraza bayramı. Tuvğan toprağınıñ işğali şaraitinde ve tecevuzcınıñ tazyığı altında bu bayram künlnrini qayd etmege mecbur olğan bütün musulmanlarnı, hususan da semetdeşlerimizni can-yürekten hayırlayım. Er keske iman ve quvet tileymiz", - dep yazdı Facebookta.
Ukrayina prezidenti Volodımır Zelenskıy 2020 senesi iyülniñ 30 tarihlı fermanı ile ükümetke bir sıra diniy bayramlarğa, şu cümleden Oraza ve Qurban bayramları da, devlet statusı berilmesi meselesini baqmağa buyurdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
