Qırım ve Kyiv kontrol etmegen Donbas topraqlarını işğalden qurtaruv meselelerini halqara seviyede ayırmağa olmay.
Böyle fikirni fevralniñ 20-nde Qırımtatar Milliy Meclisiniñ reisi Refat Çubarov Kyivdeki «Qırım: altı yıldan soñ. Yarımadanı işğalden qurtaruv yolları ve mehanizmleri» tögerek masasında bildirdi, dep haber ete Qırım.Aqiqat mühbiri.
«Donbas sözü olğan yerde – birden Qırım sözü. Donbas aqqında areket olsa – birden Qırım aqqında ve aksine olmalı. Er bir dialog buña uymaq kerek. «Normand dörtü» çerçivesinde Putinnen (Rusiye prezidenti Vladimir Putinnen – QA) dialog olmasını talap etseñiz, Ukraina devletiniñ topraq bütünligi aqqında Qırım Muhtar Cumhuriyeti ve Aqyarnen beraber halqara seviyede tanılğan sıñırlarda aytmaq içün oturıñız. O qadar! Başqa fikirler olamaz», – dep tüşüne Çubarov.
Yuqarı Radadaki «Ğolos» («Ses») fraktsiyasınıñ reberi Sergey Rahmanin Qırım.Aqiqatqa izaat berip, Qırım ve Donbasnı yañı meydançıqta muzakere etmek içün Minskten vazgeçmeli, dep qayd etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
