Ukraina prezidenti Petro Poroşenko Donetsk ava limanı içün cenkleşken ukrain askerleri aqqında «Kiborğı» filmini çıqarğan qırımtatar asıllı Ukraina rejissörı Ahtem Seitablayev ile körüşti.
«Samimiy insanlarnen keçirilgen bu sıcaq körüşüvler ömür boyu unutılmay. Ahtem Seitablayev ve İvanna Dâdüranıñ musafirçen evi «Kiborğı» efsaneviy filmini çıqarğan insanlarnı, askerlerni, hususan, Donetsk ava limanındaki ceennemden keçkenlerni bir masa başında topladı», – dep tarif etti Poroşenko Facebook saifesinde.
Onıñ aytqanına köre, bütün laflar «cenk ve zafer, Qırım, Donbasnıñ qaytuvı ve Ukrainanıñ bahtlı keleceginen» bağlı edi.
Bundan ğayrı, Poroşenko rejissör ve taqımınen «hususan cenk vaqtındaki sanat inkişafı» aqqında laf etti.
«Film çekimlerinden qalğan ikâyelerni diñlemege ve ukrain yırlarını beraber yırlamağa pek meraqlı oldı. Bu insanlarnen qoqulı pilâv da kelişe, tıpqı Bağçasarayımızda olğanı kibi», – dep yazdı Ukraina Devlet yolbaşçısı.
Onıñ qayd etkenine köre, devlet ukrain kinosını, ilk evelâ da cenk filmlerini maliye etmeli – «yaralar açıq olğanda, kerçek unutılmağanda ve saqlanmanılmağanda».
«Quvanam, çünki Ahtem (Seitablayev – QA) Rusiye-Ukraina cenkiniñ qaraman tedbirleri aqqında yañı levha üzerinde çalışa. Eminim ki, bu film «Kiborğı» kibi tek ukrain seyircilerini degil, Avropa ve dünya seyircilerini ayrette qaldıracaq», – dep yazdı Poroşenko Facebookta.
«Kiborğı» filmi 2017 senesi dekabrniñ 7-nde Ukraina kinoteatrlerinde kösterilmege başladı. Levha memleketniñ şarqındaki Ukrainanıñ terrorizmge qarşı tedbirleri vaqtında Donetsk ava limanı içün uruşlarnı köstere. Rejissör Seitablayevniñ qayd etkenine köre, filmi cenk draması ola.
Levha Ukraina Devlet kinosınıñ aman-aman 24 million ğrıvnâ maddiy yardımını aldı, masraflarnıñ yarısını qarşıladı.
2017 senesi dekabrniñ 6-nda Poroşenko Ahtem Seitablayevge III derece «Fazilet» nişanını berdi.
