Avgustnıñ 25-ne keçken gecesi Qırım ve Aqyarğa pilotsız uçaqlar ücüm etti, dep bildirdi Rusiyeni desteklegen telegram kanalları.
Olar Aqmescit ve yaqınlarındaki bir sıra mesken yerde pilotsız uçaqlarnıñ uçuşını aks etken videonı yayınladılar.
Aqyarnıñ işğal yolbaşçısı Mihail Razvojayev de dronlar ücümi aqqında bildirdi. İlk malümaqa köre, Hersones civarında deñiz üzerinde bir qaç dron yoq etilgen.
"Acele hızmetler grajdanlıq infraterkibiniñ bozulmasını qayd etmeyler", - dep bildirdi o.
Biraz soñra Rusiye Mudafaa nazirliginde avada 42 pilotsız uçaq qayd etilni aqqında bildirdiler.
Ukrayina devlet başı Volodımır Zelenskıy Qırımda mahsus istihbarat ameliyatı vaqtında Ukrayina tarafından ğayıplar olmağanını tasdıqladı. Onıñ sözlerine köre, yarımadanıñ işğalden azat etilmesi aqqında qonuşmaq daa erte.
Evel Ukrayina istitihbaratındaki menbalar Qırım.Aqiqatqa Tarhankunt burnundaki Mayak qasabasında gemilerniñ ve aviatsiyanıñ iştiragi ile uruş yüz bergenini bildirgen edi.
Tarhankut barnu civarında atış aqqında SHOT Rusiye telagram kanalı haber etken edi.
Ukrayina Mudafaa nazirliginiñ Baş istihbarat idaresiniñ temsilcisi Andriy Yusov arbiy deñiz flotunıñ iştiragi ile Qırımda mahsus ameliyatnıñ keçirilmesi aqqında malümatnı tasdıqladı.
Rusiye akimiyeti ve Qırımdaki RF arbiyleri vaziyetni şimdilik daa izaatlamadılar.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
