Qayd etilgenine köre, Qırımda Keriç şeer okrugından Sarı Bolat (Portovoye) köyüne qadar 525,4 kilometr teşkerile, umumen kirlengen qum ve topraqnıñ 697 tonnası toplandı.
Aqyarda Laspi ve Andreyevka qasabaları arasında yalınıñ 165 kilometri teşkerile, 650 tonna kir toplap çıqarıldı.
Rusiye Fevqulâde vaziyetler nazirligi bildirgenine köre, Qara deñizde 18 tonna cermay qalımtısı toplandı. Rusiyeniñ Krasnodar ülkesinde Panagiya burnundan Anapanıñ Merkeziy plâjına qadar yalıda cermay mahsulatlı qalımtılar tapıldı. Regionda 181 biñ tonnadan çoq kir toplandı.
Qırım.Aqiqat bildirgenine köre, mazut taşığan eki «Volgoneft» tankeri bazar künü, dekabrniñ 15-nde, resmiy malümatqa köre, furtuna sebebinedn Keriç boğazında battı.
Tankerler batqanı içün cermay töküldi. Rusiye kütleviy haber vastalarınıñ malümatına köre, «Volgoneft-212» 4300 tonna mazut taşıdı. Shot ve Baza «Volgoneft-239» tankerinde de aman-aman aynı kölemde mazut bar edi.
Rusiye Deñiz qurtaruv hızmeti Keriç boğazında dekabrniñ 15-nde tankerlerniñ batması neticesinde Qara deñizge 2,4 biñ tonna cermay aqıp ketti, dep bildirdi.
Qırımnıñ Rusiye yolbaşçısı Sergey Aksenov Qırımda mazut çıqaruvları ile bağlı vaziyet, tahminlerge köre, daa beterleşe bilecegini, buzlav ölçüsiniñ Rusiyeniñ Krasnodar ülkesiniñ yalı boyunda qayd etilgen seviyege çıquv telükesi yüksek olğanını bildirdi.
Ukrayina ekologiya nazirligi tanker qazasından soñ mazutnıñ tökülüvi planktonnıñ ölümine, balıqlar, deñiz quşları ve diger canlı organizmlerniñ zeerlenmesine, deñiz nebatatı ve ayvanatınıñ yaşağan yeri olğan tüp çökündileri ve yalı boyu alanlarınıñ kirlenmesine ketirecegini bildirdi. Müessise esaplağanına köre, felâketten Qara deñizniñ ekosistemasına 14 mlrd dollardan ziyade zarar ketirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
