Qırım ve Aqyarda künde COVID-19 hastalarınıñ ve ölgenlerniñ sayısı eksilmege devam ete, dep haber ete yerli başlıqlar.
Berilgen malümatqa köre, keçken künü Qırımda 120, Aqyarda ise 61 yañı koronavirus hastası qayd etildi.
Aynı zamanda, Qırımda 24, Aqyarda eki hasta vefat etti.
Dekabrniñ 17-nde Qırımda COVID-19 sebebinden kütleviy yılbaş tedbirleri yasaqlandı.
Dekabrniñ 10-nda Qırımda 18 yaştan büyük şahıslarnı koronavirusqa qarşı aşı yaptırğanlarına dair sertifikatlarnı ve kütleviy tedbirlerge kirmek içün QR kodlarını köstermege mecbur ettiler.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
