Qırımda dekabrniñ 22-nde 24 hasta vefat etti, Aqyarda ise 3. Bunı yerli başlıqlar haber etti.
Qırımnıñ Sağlıq saqlav nazirliginiñ malümatına köre künde 151 yañı COVID-19 hastası qayd etilgen, 195 kişi tüzelgen.
Aqyarda ise 72 yañı hastası qayd etilgen ve 220 kişi tüzelgen.
Hatırlatamız, keçende Rusiye akimiyeti Qırımda 25, Aqyarda 4 hasta vefat etkeni aqqında bildirgen edi.
Dekabrniñ 17-nde Qırımda COVID-19 sebebinden kütleviy yılbaş tedbirleri yasaqlandı.
Dekabrniñ 10-nda Qırımda 18 yaştan büyük şahıslarnı koronavirusqa qarşı aşı yaptırğanlarına dair sertifikatlarnı ve kütleviy tedbirlerge kirmek içün QR kodlarını köstermege mecbur ettiler.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
