Qırım ve Aqyarda künde yañı koronavirus hastalarınıñ sayısı artmağa devam ete, dep bildire yarımadanıñ Rusiye ükümeti saytları.
Berilgen malümatqa köre, Qırımda 469 koronavirus hastası qayd etildi, 91 hasta hastahanege alındı. Bir künde 448 kişi yahşı oldı, 8 vefat qayd etildi.
Aqyarda 351 yañı hasta qayd etildi, 43 insan hastahanege alındı. Umumen bir künde 27 kişi tüzeldi, 53 yaşından 84 yaşına qadar 4 insan vefat etti.
Aqyarda COVID-19 hastalığı vaziyeti sebebinden eki mektep uzaqtan çalışacaq. Qırımda 300-den çoq mektep sınıfı «uzaqtan tasilge» keçti.
Yanvarniñ 28-nde saba Qırım ve Aqyarnıñ Rusiye akimiyeti 756 yañı COVID-19 hastası bildirdi.
Yanvarniñ 17-nde Qırımnıñ Rusiye yolbaşçısı Sergey Aksenov, Qırımda «omikron» ştammı qayd etildi, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
