İlhaq etilgen Qırım ve Abhazistan (Gürcistannıñ separatist bölgesi) biznes saasında emekdeşlik aqqında añlaşmanı imzaladı. Qırımnıñ rusiyeli başı Sergey Aksönov bildirgeni kibi, bunıñ içün Abhazistannıñ birinci vitse premyeri Deur Arşbu yarımadağa keldi.
"Bugün Abhazistan ve Qırımnıñ ticaret palataları arasında İş şurasınıñ yaratılması aqqında añlaşma tizildi. Bu iş şurasına büyük ümütlerimiz bar. Olar, bu yöñelişte bütün müim meselelerni çezip, biznesni eki tarafqa yürsetmeli", - dedi Arşba Aqmescitte matbuat konferentsiyasında.
Aksönov ise, Qırım daa añlaşma tizilmesinden evel Abhazistandan çaqıl ve qumnı satın alıp başlağanını qayd etti.
Abhazistan, Gürcistannıñ separatist bölgesi, 1993 senesinde Gürcistan ile cenkten soñ mustaqillikni ilân etti. Rusiye Abhazistandaki separatist keylerge daima qol tuta edi, 2008 senesinde ise beş künlik Gürcistan-Rusiye cenkinden soñ, Abhazistannıñ mustaqilligini tanıdı. Gürcistan, Abhazistan ve Cenübiy Osetiyanıñ topraqlarını Rusiye tarafından işğal etilgen, dep saya ve Rusiyeni topraq bütünliginiñ bozmasında qabaatlay.
