Qırımlı uquq qoruyıcısı Lutfiye Zudiyevanıñ, advokat Emil Kurbedinovnıñ evlerinde keçirilgen tintüv ve yaqalanmalar, uquq qoruyıcı Abdureşit Cepparovnıñ apiske alınması Qırımnıñ ilhaqından soñ halqara toplulıq tarafından Qırım uquq qoruyıcılarınıñ immunitetiniñ zayıflaşqanını köstere. Bunı Qırım.Aqiqatqa advokat Nikolay Polozov bildirdi .
Polozovnıñ qayd etkenine köre, Rusiyeniñ Ukrayinağa qarşı büyük cenk başlağanından soñ halqara toplulıq Rusiye akimiyetine insan aqları ve söz serbestligini qorçalav meselelerinde tesir etip olamay.
''Yazıq ki, Rusiyeniñ Ukrayinağa istilâsı başlağanından berli eki yıl keçti, dünya toplulığınıñ Rusiye akimiyetine tesir etmek içün semereli aletleri qalmadı. Kremlniñ daa evel aşmağan bir çoq "qırmızı sızıqları" bir qaç ay içinde artta qaldı. Em qanunlarnıñ sertleştirilüvi, em muhalifetçilerniñ apishanelerde öldürilüvi, em de aq qorçalayıcılarnıñ taqip etilüvi. Men bellesem, repressiyalar, şu cümleden işğal etilgen Qırımda da, tek quvetleşecek. Ne yazıq ki, Qırım aq qorçalayıcıları ilk olaraq zarar köre", - dep ayttı advokat.
Daa evel Canköyde uquq qoruyıcı ve "Qırım birdemliginiñ" faali Lutfiye Zudiyevanıñ evinde tintüv keçirildi. Bundan soñ qadınnı Aqmescitteki "Ekstremizm ile küreş merkezi"ne alıp kettiler.
Tintüv vaqtında uquq qoruyıcılar video nezaret registratorını, bütün telefonlarnı, fleş-disklerni ve noutbuknı tutıp aldılar. Tintüv yerine advokatlar Emil Kurbedinov ve Edem Semedlâyev keldi. Evge kirmege tırıştılar, amma olarnı kirsetmediler.
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri - yarımadanıñ Rusiye tarafından ilhaqına yardım etkenlerni tapmaq ve mesüliyetke çekmek olacaq". Onıñ aytqanına köre, insanlıqqa qarşı cinayetler ve arbiy cinayetler yapqanlar, insan aqlarını bozğanlar ve genotsid olaraq tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
