Qırım uquq qoruyıcı gruppası Viyanada dünyada demokratiyanı qorçalavğa yardım etkeni içün Democracy Defender Award mukâfatını aldı, dep bildirdi teşkilâtnıñ idare yolbaşçısı Olğa Skrıpnık.
Bu mukâfat 1996 senesi OBSE iştirakçi 8 memleket tarafından tesis etildi: AQŞ, Kanada, Çernogoriya, Danimarka, Büyük Britaniya, İsveçiya, İsviçre ve Felemenk.
"Democracy Defender Award – bu yalıñız Qırım uquq qoruyıcı gruppasınıñ işiniñ tanılması degil, bu Ukrayinanıñ bütün aq qorçalayıcı areketiniñ, hususan Ukrayinağa ve Rusiye tarafından işğal etilgen topraqlarda, şu cümleden işğal etilgen Qırımda, demokratiya qıymetlerine sadıq qalğan, adalet içün ayatını telükege oğratqanlarnıñ emiyetiniñ işareti. Bu sebepten rusiyeliler olarnı öldüreler, işkencege oğratalar, azatlıqtan marum eteler", - dedi Skrıpnık.
O şunı da qayd etti ki, işğal etilgen ukrayin toprağınıñ er bir kilometri Rusiye ordusını diger demokratik memleketlerniñ sıñırlarına yaqınlaştıra, şunıñ içün Ukrayinanıñ ğarbiy ortaqlarınıñ yardımına ihtñyacı bar.
"Ukrayinada demokratik deñişmelerni qorçalağan zenaatdaşlarımnıñ çoqusı, uquq qoruyıcılar, jurnalistler, faaller - bugün ukrayin ordusındadır, çünki insanlarnıñ ayatını qorçalamaq, insan aqlarını qorçalamaq ve demokratik dünyanı qorçalamaq içün başqa bir yol qalmadı. Olardan çoqusı uruşta elâk oldı", - dep qoştı QUG idaresiniñ yolbaşçısı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
