Ukrayina Silâlı Quvetleri diger işğal etilgen bölgeler üzerinde nezaret tam ğayrıdan tiklengence Qırımnıñ azat etilmesine başlay bilir. Böyle fikirni Qırım.Aqiqatqa ukrayin arbiy eksperti Oleg Jdanov bildirdi.
Jdanovnıñ sözlerine köre, Ukrayina ordusı Qara deñiz saili boyunca muvafaqiyetli ilerilese, Qırımda ameliyat başlay bilir.
"Eger ordumıznıñ sail boyunca ilerilemesi muvafaqiyetli olsa, quvetlerimizniñ Rostov vilâyetiniñ sıñırlarına yaqınlaşmasını beklemeden, deral Qırımğa kire bilirmiz. O zaman quvet ve silâlarnıñ bir qısmını Qırımğa yollamağa ihtimal bar, em de bugünde andaki quvetlerniñ sayısı istilânıñ ilk künlerinde olğanı kibi çoq degildir. Ordunıñ episi Ukrayina cenübindedir. Olar Qırımnı tranzit, tamir etüv bazası kibi qullanalar", - dey ekspert.
Böyle bir ameliyatnıñ başlanmasından evel quveti Qırım üzerinde nezaretni ğayrıdan tiklemek içün yeterli olğan bir taqım şekillendirilmeli. Jdanovnıñ fikrece, bugünde Ukrayinanıñ bunıñ içün yeterli qadar tehnikası yoq.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
