Qırım ukrainleriniñ ülke şurası Vaqtınca işğal etilgen Ukraina topraqlarınıñ reintegratsiya meseleleri nazirliginiñ reberligine al-azırda Rusiye SİZO-sında bulunğan ukrain faali Oleg Prıhodkoğa ve onıñ ailesine maliyeviy yardım köstermesini istep, muracaat etken. Bu aqta teşkilâtnıñ Facebooktaki beyanatında yazıla.
“Açıq menbalardan belli oldı ki, yaqınlarda “Ukrainağa qarşı silâlı tecavuz neticesinde azatlıqtan marum etilgen şahıslar olaraq tanılması ve olarnıñ içtimaiy mudafaası içün yapılğan tedbirlerniñ amelge keçirilüvi ile bağlı meselelerniñ baqılmasına dair idarelerara komissiyasınıñ” toplaşuvlarından birinde ukrain Oleg Prıhodkoğa maliyeviy yardım köstermesi aqqında sual baqılğanı belli oldı. Amma belli olmağan sebeplerden mesele alâ daa keregi kibi çezilmegen”, – yazıla beyanatta.
Qırım ukrainleriniñ ülke şurasınıñ reisi, “Krımska svitlıtsâ” gazetiniñ baş muarriri Andriy Şçekun ukrain nazirligine bu mesele ile bağlı resmiy mektüp yollağan.
“Devlet müessiseleriniñ diqqatını işğal etilgen Qırımda ukrainlerniñ aq ve serbestliginiñ bozuluvına kene de çekemiz. Tecavuzcı memleketniñ cinayetleri aqqında aytmalımız. Qırımdaki ukrainlerniñ aqlarını halqara seviyede qorumaq içün semereli devlet siyasetini amelge keçirmelimiz. Boş laf yerine, tez cevap berip, kerçek çareler körmelimiz. Areket – eñ semereli silâmızdır”, – teşkilât Andriy Şçekunnıñ aytqanlarından alıntı ketire.
Ukraina nazirliginiñ bunıñ aqqında açıq cevabı şimdilik yoq.
Dekabrniñ 16-nda soñki mahkeme oturışuvında Rusiye prokurorı Prıhodko içün üç yılını apishanede keçirecek 11 yıl sert rejimli koloniyada qalmasını istedi ve 200 biñ ruble para cezası berilmesini talap etti.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız yapqanında qabaatladı.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Advokat Nazim Şeihmambetovnıñ malümatına köre, Prıhodko Aqmescit SİZOsınıñ mahsus blokunda tutula.
Bundan evel Prıhodko memuriy dava boyunca işğal etilgen Qırımda mesüliyetke çekildi.
Kreml kontrolindeki Qırımnıñ Saq rayon mahkemesi iyünniñ 25-nde qırımlığan 2 biñ ruble para cezasını berdi. Mahkeme onı Rusiye memuriy cinayetler kodeksiniñ 20.3 maddesiniñ birinci qısmına istinaden qabaatlı dep tanıdı. Qırım.Aqiqatnıñ elinde olğan mahkeme qararına köre, faalniñ evinde tintüv vaqtında tutıp alınğan eşya ve vesiqalarnıñ «tedqiqatı» «Prıhodko üçünci şahıslarnıñ bu eşya ve vesiqalarğa irişmesi vastasınen natsist timsallerini propaganda etkenini ve köstergenini» işaretlemekteN
Faalniñ özü evindeki bütün timsaller «antika», dava malümatında olğan svastikalı kölmek ise «suvenir» ve 2010 berli onda olmağanını ayttı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
