Link açıqlığı

Saatnıñ esas haberi

«Qırım – Ukrainanıñ bir parçasıdır» – Çeh Cumhuriyeti Tış işler nazirliginiñ yarımada işğaliniñ yıllıq beyanatı


Qırım işğaliniñ yıllığı. Resim
Qırım işğaliniñ yıllığı. Resim

Çeh Cumhuriyeti Tış işler nazirliginiñ bildirgenine köre, olar Rusiye işğal etken Qırımnı Ukrainağa ait topraq olaraq saymağa devam eteler. Bu aqta çeh diplomatlarınıñ yarımada işğaliniñ yıllığınen bağlı beyanatında aytıla, dep bildire Azatlıq Radiosı.

«Çeh Cumhuriyeti Avropa Birligi ve dünya memleketleriniñ ekseriyeti kibi Qırım yarımadasını Ukrainanıñ bir parçası dep saya. Qomşu devletniñ toprağını zapt etmek içün qomşu tarafından arbiy küç qullanıluvını öz tarihımızda biz de körgen edik, şu sebepten Qırım ilhaqını tanımaymız», – dep aytıla beyanatta.

Bundan ğayrı, Çeh Tış işler nazirligi Qırımnıñ askeriyleştirilüvini ve Rusiye tarafından yarımada yanında gemilerniñ serbest keçmesine mania yapılğanını takbih etti.

«Qırım topraqlarınıñ askeriyleştirilüvi ve Rusiye tarafından Keriç boğazı ve Azaq deñizinde serbest keçişniñ bozuluvı halqara uquq, Avropadaki istiqrar ve telükesizlikniñ sert bozuluvı ola», – dep aytıla beyanatta.

Çeh nazirligi Rusiyeni insan aqları saasında halqara şartlarğa uymasına ve «Oleg Sentsov ve qanunsız tutulğan diger Ukraina vatandaşlarını, hususan 2018 senesi noyabr ayında ukrain gemilerine kerçekleştirilgen ücüm vaqtında zapt etilgen deñizcilerni acele azat etmesine» çağıra.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG