Ukraina prezidenti Volodımır Zelenskıy dekabrniñ 6-nda qayd etilgen Ukraina Silâlı Quvetleri Künü munasebetinen derc etken video levhasında Ukraina Rusiye işğal etken Qırım ve Donbas topraqlarını öz kontroline qaytaracaq, dep ayttı.
«İnsanlarımıznı ve topraqlarımıznı mıtlaqa qaytaracaqmız. Donbas – Ukrainadır. Lugansk – Ukrainadır. Qırım – Ukrainadır», – dedi Zelenskıy.
Onıñ qayd etkenine köre, şimdi Ukraina «beş yıl evelsi olğanından bayağı küçlü oldı».
Ukraina Silâlı Quvetleri Künü er yıl dekabrniñ 6-nda qayd etti. 1991 senesi şu künü Ukrainanıñ buña dair qanunı qabul etilgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
