Kyivde cumaertesi künü, martnıñ 14-nde, Ukraina göñülli künü munasebetinen yürüşte iştirak etkenler Rusiye elçihanesi ögünde narazılıq aktsiyasını ötkerdi. Bu aqta Ukraina kütleviy haber vastaları bildire.
Rusiye elçihanesi Mıhaylivska meydanından ve Ukraina ükümet kvartalından başlağan yürüşniñ soñki noqtası oldı.
«Ukrinform» Ukraina haber agentliginiñ malümatına köre, elçihane ögündeki tedbirde 1,7 biñ insan iştirak etti, qollarında sarı-mavı ve qırmızı-qara bayraqlar bayraqlar, «Veteran qardaşlığı», «Azov» bayraqları bar edi, bazılarınıñ urbasında «Natskorpus» yazısı bar edi.
Berilgen malümatqa köre, faaller gimnni yırlap, «Yaşasın Ukraina – Qaramanlar yaşasın», «Qırım – Ukrainadır», «Donetsk – Ukrainadır», «Lugansk – Ukrainadır» şiarlarını seslendirdi ve «Ukrainadan ketiñiz» dep qıçırdı ve binadan Rusiye bayrağını alıp taşlamağa talap etti.
Rusiye elçihanesi etrafında telükesizlik tedbirleri quvetleştirildi: Milliy gvardiyanıñ yüzlernen askeri, onlarnen politsiya ve fevqulâde vaziyetler maşinası nevbetçilik yaptı, elçihane etrafında ise yüksek qora qoyuldı.
«5 kanal» malümatına köre, al-azırda tedbir bitti ve iştirakçiler dağıldı.
Hatırlatamız, bugün Kyivde Göñülli künü munasebetinen yürüş olıp keçti, onıñ iştirakçileri Ukraina prezidenti Volodımır Zelenskıyge talaplarını ayttı.
