Ermeni Bazardaki "Qırım titanı" zavodınıñ işçilerini koronavirusqa qarşı aşı sertifikatını taqdim etseler er birine 2 biñ ruble bereceklerine iandırdılar. Bunı "Krım 24" neşrine "Titan yatırımları" şirketiniñ müdir muavini Andrey Doganov bildirdi.
Onıñ sözlerine köre, muvafıq ferman işhanede çıqarılğan. Şunı da qayd etti ki, koronavirusqa qarşı aşını zavodda yapmaq mümkün.
"İşhaneniñ müdiriyeti, tseh, bölükler reberleri añlatuv işinen meşğuller. Bundan ğayrı, Ermeni Bazar şeer hastahanesiniñ tibbiyet hadimlerini davet ettik, olar er kesni aşı aqqında malümatnen tanıştıra", - dedi Dogadov.
Keçken künü Qırımda 604 koronavirus hastası qayd etildi, tünevin hasta sayısı daa az edi ve bu raqam pandemiya vaqtında Qırımda bir künde qayd etilgen eñ büyük raqam oldı.
Oktâbrniñ 14-nde Rusiye kontrolindeki Qırım baş nazir muaivni, emek ve içtimaiy qoruv naziri Yelena Romanovskaya yarımada hastahanelerinde koronavirus hastaları içün yerlerniñ 88%-ı tolu, dep bildirdi.
Rusiye kontrolindeki Qırım ükümetiniñ reisi Yuriy Gotsanük Qırımda aşı olğan sakinler içün QR-kod sistemasınıñ kirsetile bile, Qırım yarımadasında tam qapanuv olacağını «şimdilik beklemeñiz», dep ayttı.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
