Qırım Arbiy Tahqiqat komiteti, Enver Seytosmanovnıñ davası boyunca şaatnıñ sorğusını keçirgen Rusiye FSBsi hadimleriniñ teşkerüvini başladı. Bunı Qırım.Aqiqatqa advokat Emil Kurtbedinov tarif etti.
Advokatnıñ aytqanına köre, Tahqiqat komitetinde, FSB hadimleri sorğu vaqtında şaatqa basqı yapa bilgenlerini farz ete.
"Arbiy Tahqiqat komiteti, şahsiyeti daa belgilenmegen FSB hadimleriniñ areketlerinde cinayet alâmetlerini, yani vazife salâhiyetini aşuv allarını köre. Sorğu vaqtında FSB hadimleri fizikiy ve psihologik basqı yaptı, dep mahkemede ifade bergen Ruslan Bekirov közde tutula. Basqı neticesinde o, yalan şaatlıqnı berip, sorğu protokolonı imzalamağa mecbur oldı", - aytıp berdi advokat.
Avgust 21-isinde Cenübiy bölge mahlemesinde şaat Bekirov, FSB idaresinde oña psohologik basqı yaptılar ve Seytosmanov aqqında yalan aytmaqqa mecburladılar, dep ifade etti.
Qırım FSB-siniñ, hadimleriniñ teşkerüvi aqqında açıq tefsiri yoq.
İyülniñ başında Rostov-na-Donu mahkemesi, video alâqasınen Seytosmanovnıñ tevqif müddetini dekabrniñ 20-sine qadar uzattı. İyülniñ soñunda ise Enver Seytosmanovnı Aqmescit SİZOsından Rostov-na-Donu şeeriniñ SİZOsına etep ettiler.
Avgustnıñ başında Şimaliy Kavkaz arbiy mahkemesinde, iştirakçisi Enver Seytosmanov olğan, Aqyar "Hizb ut-Tahrir davası"nıñ birinci oturışı keçirildi.
Hatırlatayıq ki, sentâbr 5 ve 6-ışnda Rusiye mahkemesi, Enver Seytosmanovnıñ davasında Aqyar "Hizb ut-Tahrir davası" boyunca mahkemelengen Nuri Primov ve Ferat Sayfullayevni sorğuğa çekti.
Rusiye quvetçileri, ağa-qardaş Ernes ve Enver Seytosmanovlarnı 2018 yılı mayıs 10-unda Aqyarnıñ Balıqlava rayonınıñ Hayto (Tılovoye) köyünde, tintüvlerden soñ tutıp aldılar.
Ernesni soñra yiberdiler, Enverge ise cinaiy dava açılğanı aqqında qarar berildi. Onı, Rusiye CK-niñ 205.5 maddesine (terror teşkilâtınıñ faaliyetini teşkil etüv ya da iştirak etüv) binaen qabaatlaylar.
