Ukraina topraq bütünligine qast etkeninde qabaatlanğan Qırımnıñ Rusiye sport naziriniñ sabıq muavini Faruh Kamalov taqiqat ile işbirligi yapmağa razı olıp, qabaatını tanığanına dair añlaşma imzaladı. Bu aqta Qırım Muhtar Cumhuriyetiniñ prokuraturası Qırım.Aqiqatqa bildirdi.
Kamalov Ukraina ceza kodeksiniñ 110-uncı maddesine köre (Ukrainanıñ topraq bütünligi ve toqunılmazlığına qast etüv) 5 yılğa üküm etildi, 3 yıl oña sınav müddeti olaraq berildi. Bundan soñ o, Qırımğa qaytıp oldı.
Kamalovnıñ esas Ukrainanı terk etkenini advokatı Valentin Rıbin de haber etti. Mahküm etilgen memurnıñ ükümnen bağlı izaatları şimdilik olmadı.
Fevralniñ 2-nde «Kalançak» keçiş noqtasında Ukraina havfsızlıq hızmetiniñ hadimleri Qırım sport naziriniñ sabıq muavini Faruh Kamalovnı yaqalağan edi. UHH spikeri Yelena Gitlânskayanıñ bildirgenine köre, yaqalanğan kişi esas Ukrainağa kelip, çetel biometrik pasportını alacaq edi.
Qırım Muhtar Cumhuriyetindeki Ukraina havfsızlıq hızmeti Baş idaresiniñ taqiqatçıları cinaiy iş açqan soñ Kamalov nezaret altına alınğan edi.
İyünniñ 14-nde QMC prokuraturası Kamalovğa nisbeten qabaat aktını mahkemege yollağan edi.
