Uquq qoruyıcı Lutfiye Zudiyevanıñ evinde tintüv keçirilmesi ve apiske alınması, Qırımda er angi qarşılıqnı bastırmaq içün faallerni ve aq qorçalayıcılarnı qorquzmaq ıntıluvıdır, dep tüşüne "Qırım SOS" talilcisi Yevgen Yaroşenko.
«За годы оккупации зафиксировано не менее 14 фактов преследований правозащитников в Крыму», – отметил он.
"İşğal yılları devamında Qırımda uquq qoruyıcılarnıñ taqip etilüvi ile bağlı eñ azdan 14 adise qayd etildi'', - dep qayd etti o.
Uquq qoruyıcı teşkilâtnıñ qayd etkenine köre, Rusiye quvetçileri er yıl yanvar-fevral aylarında tintüvlerni quvetleştireler, bu Qırım işğaliniñ yıllığı ile bağlı ola bile.
Hatırlatamız, saba Canköyde uquq qoruyıcı ve "Qırım birdemligi" faaliniñ Lutfiye Zudiyevanıñ evinde tintüv keçirildi. Bundan soñ qadınnı Aqmescitteki "Ekstremizm ile küreş merkezi"ne alıp ketkenler.
Zudiyevanıñ evinde keçirilgen tintüv devamında telükesizlik hadimleri video nezaret registratorını, bütün telefonlarnı, flash-disklerni ve noutbuknı tutıp alğanlar. Berilgen malümatqa köre, tintüv yerine advokatlar Emil Kurbedinov ve Edem Semedlâyev kelgen. Evge kirmege tırışqankar, amma olarnı kirsetmegenler.
Oña qarşı eki memuriy protokol tizilgen. O, "kütleviy haber serbestligini qullanğan" eken. Birincisi, Zudiyevanıñ Facebook saifesinde ''Hizb ut-Tahrir'' diniy areketiniñ Rusiyede terroristik teşkilât olaraq tanılğanını qayd etmegeni, ekincisi ise, ''Azatlıq Radiosı''nı çetel agenti olaraq qayd etmegeni içün.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
