Teşkilâtçılarnıñ bildirgenine köre, aktsiya 2025 senesi saban ayı 17-24 künleri devam etecek ve bütün dünyağa Qırım Ukrayinanıñ bir qısmı olğanını hatırlatmaq maqsadınen keçirilecek.
"Qırım, Rusiyeniñ istilâsı ve dünya toplulığınıñ sessiz razılığı sebebinden Ukrayinanıñ ilk işğal etilgen territoriyası oldı. Bizler Ukrayina işğali nasıl başlağanını unutmaycaqmız ve dünyanı devletimizniñ topraq bütünliginiñ ğayrıdan tiklenilmesi kerek olğanını hatırlatmağa tırışamız", — dep qayd ete Strichka taqımı.
Aktsiya çerçivesinde faaller dünyanıñ çeşit memleketlerinde şeerlerniñ merkeziy meydanlarına Qırım ile bağlı simvolik soqaq adlarınen levhalar, plakatlar ve infografiknen çıqmaqnı planlaştıralar.
Bundan ğayrı, onlayn kampaniya planlaştırıla, onıñ çerçivesinde #CrimeaIsUkraine adlı heşteg ile içtimaiy ağlarda offline tedbirlerniñ fotoresimleri ve videoları derc etilecek.
Teşkilâtçılarnıñ qayd etkenine köre, aktsiyanıñ bütün tafsilâtlarını Strichka ilâvesinde ögrenmek mümkün.
2014 senesi martnıñ 16-nda Qırım ve Aqyarda yarımadanıñ statusı aqqında "referendum" keçirildi, onı dünyanıñ çoqusı memleketleri tanımadı, onıñ neticelerine köre Rusiye Qırımnı öz terkibine kirsetti. Ne Ukrayina, ne Avropa Birligi, ne de ABD "referendum" rey berüviniñ neticelerini tanımadı. Rusiye prezidenti Vladimir Putin 2014 senesi mart 18 künü Qırımnıñ Rusiyege qoşulğanını ilân etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
