Aqmescitniñ №1 Tahqiqat izolâtorında oktâbr 13-ünde mabüs vefat etti. Bunı oktâbr 15-inde, ilhaq etilgen Qırımda Rusiyeniñ Cezalarnı yerine ketirüv federal hızmetiniñ idaresine atıf etip, rusiyeli "İnterfaks" bildirdi.
"2019 senesi oktâbr 13-ünde, saat 19:50-de SİZO-1 kameralarınıñ birisinde 1968 senesi doğma qabaatlanğan Ş. yaramadı. Tibbiy bölükniñ hadimleri kelgende, qabaatlanğan essiz edi, oña kerekli tibbiy yardım yapıldı, acele yardım çağırtıldı, reanimatsiya tedbirleri keçirildi. Yazıq ki, qabaatlanğannı qurtarıp olamadılar", - dep yaza "İnterfaks".
Cezalarnı yerine ketirüv federal hızmetiniñ idaresiniñ malümatına köre, "qabaatlanğan Ş., sağlığına 2019 senesi martta şikâyet etip başladı, müessisenin tibbiy bölüginde baqıla edi ve kerekli tedaviylevni ala edi. Tibbiy baqıluvğa şikâyet etmey edi. Müessisede ölüm sebebinden teşkerüv keçirile, malümatnı taqhiqat organlarına yollaycaqlar", - denile müessiseniñ beyanatında.
Daa evel salı künü Qırım matbuatı, olarnıñ malümatına köre, Aqmescit SİZOsında tibbiy yardım vaqtında etilmegeni sebebinden 30 yaşındaki aqay keçingenini bildire edi.
Qırım Cemiyet Nezaret Komissiyası (CNK), bu malümatnı teşkere, dep "İnterfaks"qa haber etti. Ve CNK qayd etti ki, Qırım SİZOsında tibbiy yardım berilmesine şikâyetler bar.
Qırımnın resmiy rusiyeli müessiseleri, mabüsniñ ölümi aqqında haber etmey, adı belli degil. Qırım.Aqiqat bu malümatnı başqa menbalardan tasdıqlamağa tırışa.
