Link açıqlığı

Qırım separatistleri yañı Anayasanı halqnen beraber muzakere etmeycekler – KHV


Qırımnıñ yañı Anayasası aprelniñ 10-na qadar qabul etilmesi mümkün. Lâkin bu mesele boyunca referendum keçirilmesi aqqında aytılmay.

Bunı «Kommersant» haber agentligine anayasa komissiyasınıñ başı, Qırımnıñ qanunsız Devlet şurası spikeriniñ birinci muavini Ğrığoriy İoffe bildirdi.

«Referendum aqqında (Anayasa boyunca – muarrir) aslı laf ketmey, – dedi İoffe.– Halq tarafından Anayasanı muzakere etmek – mence, yalan bir demokratiya, Sovetler Birligi devrini añdıra».

Onıñ fikirince, «vesiqanı mütehassıslar toplulığında muzakere etmek kerek: vatandaşlarnıñ 99% uquqiy tilni añlamasa da olur». İoffe qayd etti ki, «bunı adamlarğa, elbette, añlatmaq kerek, amma añlayışlı bir tilde».

«Mence, biz Qırım parlamentiniñ mahsus sessiyasını ötkermek teklifine qol tutıp, sessiyada Anayasanı qabul eterik – zanımca, aprelniñ 10-na qadar. Ve özümizni tolusınen Rusiye Federatsiyasınıñ subyekti olaraq is etip olurıq», – dep ayttı İoffe.

Anayasağa binaen, region yolbaşçısını deputatlar saylaycaq ve devlet şurasınıñ bir de bir vazifege tayin etmek aqqı olacaq.
XS
SM
MD
LG