Qırım separatistleri tanılmağan Cumhuriyetniñ yañı anayasasını qabul ettiler

Bugün tanılmağan Qırım Cumhuriyeti Devlet Şurasınıñ nevbetten tış umumiy toplaşuvında yañı Anayasa qabul etildi.

Bunı Qırımnıñ qanunsız parlamentiniñ matbuat hızmeti bildire.

İşğal etilgen Qırımnıñ yañı Anayasasına 88 deputat qol tuttı.

İşbu vesiqa qabul etilgende, salonda Qırım parlamentiniñ sabıq deputatı, artıq Rusiye Federatsiyası Federal Keñeşi Federatsiya Şurasınıñ azası olğan Sergey Tsekov, Qırımnıñ öz başına tayin etilgen baş naziri Sergey Aksönov ve «Qırım ükümetiniñ» azaları, sabıq halq deputatı Boris Deyç, Rusiye Federatsiyasınıñ Aqmescitteki Baş konsulı Vâçeslav Svetliçnıy, şeer yolbaşçıları ve rayon devlet memuriyetleriniñ reisleri bulundı, – aytıla beyanatta.

Tünevin Qırımtatar Milliy Meclisi toplaşuvında işbu Anayasa leyhasını tenqid ettiler ve qırımtatarlarğa maqbul olmağanını qayd ettiler.