Link açıqlığı

Qırım separatistleri millet mensüpligi ve tiller aqqında ayrı bir qanunlarnı yazacaq ola


Qırımda milletlerara munasebetler saasını deñiştirmek içün yañı Anayasanen beraber ayrı bir qanun olmalı.

Bunı anayasa komissiyasınıñ reisi, Qırım Cumhuriyetiniñ Devlet Şurası olaraq adlanğan Qırım parlamenti spikeriniñ birinci muavini Grigoriy İoffe bildirdi, dep haber ete matbuat hızmeti.

«Maña, anayasa komissiyasınıñ reisine olaraq, bir qaç sual berile. Şu cümleden, sürgün olunğan halqlarnıñ taqdiri, milletlerara saasınen bağlı meseleler ola. Qırım – çoq milletli bir region. Yarımadada yaşağan qavimler sayısı – baylığımız, medeniyet, til, eyi qomşulıq baylığımızdır. Menim fikirimce, Qırım Cumhuriyetiniñ milletlerara munasebetler saasınen bağlı ayrı bir qanun qabul etilecek», – dep ayttı İoffe.

Aynı vaqıtta o, Qırımnıñ Esas qanunı «er bir millet, halq ve qavimniñ kendi medeniyet, til, tarihı inkişafına aqqı bar olğanını ve iç bir kimse onı bu aqqından marum qaldırıp olamağanını açıq-aydın ve añlayışlı bir şekilde köstere», dep qayd ete.

«Anayasamız Rusiye qanunları ve Rusiye Anayasasına esaslanıp, Rusiye Federatsiyası tarafından tanılğan ve Rusiye qanunlarınıñ bir qısmı olğan halqara vesiqalarğa da boysuna. Qırımnıñ eñ büyük millet gruppaları – rus, ukrain ve qırımtatarlarnıñ tilleri devlet tilleri olaraq tanılacaq. Böyle bir madde Anayasada bar», – dep bildire anayasa komissiyasınıñ başı.

Aynı vaqıtta, onıñ aytqanına köre, Qırım tiller aqqında ayrı bir qanunnı qabul etmeli.
XS
SM
MD
LG