Qırımlılarğa yarımadada yağğan küçlü sağanaqlar ve sel neticesinde ketirilgen zarar 171 mln ruble ola. Bu aqta Qırımnıñ Rusiye ükümetiniñ yolbaşçısı Yuriy Gotsanük Fevqulâde vaziyetler komissiyasınıñ toplaşuvında ayttı.
«Umumen bugünge qadar 866 akt tizildi», – dep qayd etti o.
Gotsanükniñ aytqanına köre, furtunadan zarar körgen 637 yarımada sakini 37 mln ruble miqdarında tazminat aldı.
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. İyünniñ 22-nde saba, Qırım qurtarıcılarınıñ malümatına köre, Yalta ve Yedi Quyu rayonında 37 ev suvda qala. Umumen suv basqan yerlerden 1783 insan tahliye etildi.
Qırımda sel aqibetlerini yoq etüv tedbirleri devam ete.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
Rusiye prezidenti Vladimir Putin Qırımğa afat aqibetlerini yoq etmek içün «acele ve büyük» yardım köstermege emir etti.
