Ukraina Tış işler naziri Dmıtro Kuleba «RBK-Ukraina» içün intervyü berip, memleketniñ tış siyaseti prioritetleri aqqında tarif etti. Onıñ aytqanına köre, bu Qırım, Rusiyege qarşı sanktsiyalar ve NATO integratsiyası.
«Bütün elçilerimizge dört prioritetnen oğraşmağa vazife berem. Birinciden, memleketniñ telükesizligi, mudafaa küçüniñ arttırıluvı, NATO integratsiyası, Rusiye istilâsına qarşılıq, istilâcı devletke qarşı sanktsion basqısınıñ temin etilüvi, vaqtınca işğal etilgen topraqlarımıznıñ qaytarıluvı, Qırımnı işğalden qurtaruv kününi yaqınlaştıruv», – dedi Kuleba.
ABD Devlet kâtibiniñ muavini Stiven Bigen qayd etti ki, Ukraina kün tertibinde qalmalı, çünki Rusiyeniñ Donbas istilâsı ve Qırım işğali «OSCE meydanlığında eñ ciddiy suverenitet ve topraq bütünliginiñ bozuluvı» olıp qala.
Ukraina akimiyeti AB ve Ğarp memleketlerini Yarımadanı işğalden qurtaruv Qırım platformasında iştirak etmesine faal sürette celp ete. Tış işler naziri Dmıtro Kuleba, Qırımnı işğalden qurtaruv sammitini Kyivde 2021 senesiniñ mayıs başında ötkermege planlaştırıla, dep bildirdi.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
