Ukrayina prezidentiniñ Qırım Muhtar Cumhuriyetindeki daimiy temsilcisi Tamila Taşeva, Qırımnıñ Rusiye akimiyetiniñ Aqmescitli student-filolog Maksim Glebovğa 30 biñ ruble para cezasını berüv qararını izaatladı. Sebep Glebov Ukrayina Yuqarı Radasınıñ sabıq deputatı İrina Farionğa qoltutuv mektübini yollağanı oldı.
''Bu dava öz devletiniñ havfsızlığı ve qoruvı altında bulunıp, vaqtınca işğal etilgen topraqnıñ sakinleriniñ taqdirine nasıl davranmaq kerek olmağanınıñ misalidir. Anda basqılar ve taqiplerden qorqıp, özlerini telükege oğratmamaq içün susmağa mecbur olğan insanlarımıznıñ sayısı çoq. Amma 10 yıl devamında susmaq pek qıyın. Olar bizden ğayrı kimnen samimiyetnen laf ete bile? İşğal altında bulunmağanlarnen degilmi? İşğalci uquq qoruyıcılarğa haber etmeycek insanlarnen degilmi?'', - dep yazdı Tasheva Facebook saifesinde.
Taşeva, Kıyivniñ kontroli altında olğan topraqlarda bulunğan insanlarnı mesüliyetli olmağa ve işğal altında bulunğanlarnı telükege oğratmamağa çağırdı.
''Ve ayrı, prezidentniñ temsilcisi olaraq, Maksimden afu soramağa isteyim. Bu vaziyetniñ peyda oluvından ve aman-aman 10 yıl devamında añlatmalar ve diger sistematik işlerden soñra bazı semetdeşlerimiz işğal etilgen topraqlarda insanlarnıñ havfsızlığı kibi sade bir şeyni añlap olamaylar, dep ayıp is etemiz", - dep qoştı memur.
Hatırlatamız, keçken sene noyabr ayında ''İrina Farіon'' telegram kanalında Maksim Glebovnıñ Ukrayina tarafdarı olğan mektübi derc etilgen edi.
Daa soñra Rusiye tarafdarı olğan Qırımdan blogger Aleksandr Talipovnıñ ''Krımskiy Smersh'' telegram kanalı Glebovnıñ student biletiniñ fotoresimini ve sorğudan alınğan videonı derc etti.
Daa soñra kütleviy haber vastaları, Aqmescitteki Rusiye çağına yetmegenlerniñ işleri boyunca komissiyası oğlanğa RF ordusınıñ ''diskreditatsiyası'' maddesine istinaden 30 biñ ruble para cezasını berdi, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
