«Voda Krıma» müessisesi müşterilerini afta soñuna qadar tamir işleri sebebinden suv temininde aqsavlar olacaq, dep tenbiley. Bu aqta Facebook haberinde aytıla.
Müessise malümatına köre, aprelniñ 23-nde qazaiy-tamir işleri keçirilgeni içün bir sıra adreste suvuq suv berilüvi sıñırlanacaq. Derc etilgen malümatqa köre, Qurman qasabasında saat 15:00-ğa qadar aşağıdaki soqaqlarda suv aqsavları olacaq: Hmelnitskiy, Matrosov, Şevçenko, Lenin, Sovetskaya, Miçurin, Frunze, Krupskaya, Çkalov, Engels, Titov, Telman ve Kiyevskaya.
Qarasuvbazarda saat 17:00-ğa qadar bu soqaqlarda: Amet-Han Sultan, Abdennanova, Küreşçiler, Mamut, Prigorodnaya, İbraimov ve Novaya.
Aqmescitte, müessise bergen malümatqa köre, «Jukov soqağındaki suvuq suv temini hatlarında bozulğan armatura deñiştirilüvi ve «Marşala Jukova» mikrorayonınıñ suvnen temin etken tulumba stantsiyasındaki tamir işleri sebebinden» suv saat 18:00-ğa qadar olmaycaq.
Aqmescitte aprelniñ 21-nden 27-ne qadar suv temini cedvel boyunca kerçekleştirilecek: saba saat 6:00-dan 9:00-ğa qadar, aqşam – 18:00-dan 22:00-ğa qadar.
Bundan ğayrı, Aqmescit rayonınıñ Colman (Pionerskoye) köyünde aprelniñ 27-ne qadar suv temini cedvel boyunca olacaq: saba saat 06:00-dan 09:00-ğa qadar, aqşam saat 18:00-dan 22:00-ğa qadar.
Martnıñ 12-nde Rusiye kontrolindeki Qırım ükümetiniñ reisi Yuriy Gotsanük, suv boru hatları eskirgeni içün yarımadada içme suvunıñ 50 fayızı coyula, dep bildirdi.
Keçken afta Qırımnıñ Rusiye yolbaşçısı Sergey Aksenovnıñ bildirgenine köre, yağanaqlar olmasa bile, Aqmescitniñ üç esas suv çoqrağı olğan Ayan yapma gölü, Aqmescit ve Partizan suv anbarlarındaki suv yedegi şeerni 3,5 ay devamında toqtamayıp suvnen temin etmek içün yeter.
Herson vilâyetiniñ devlet memuriyeti, aprelniñ 4-nde Şimaliy-Qırım kanalı toldurıldı ve kanaldan işğal etilgen Qırımğa suv berilmey, dep işandırdı.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
