Qırım Rospotrebnadzor (Rusiye federal nezaret hızmeti) idaresi, yarımadada gripp hastalığına qarşı aşılavnıñ yekünlenmesini haber ete. Onıñ neticesinde ealiniñ deyerli yarısı aşılandı.
"Yarımadada bala ve büyüklerniñ gripp hastalığına qarşı aşılav kampaniyası yekünlendi. Onıñ neticesinde 1 086 014 adam aşılandı, olardan 226 684-ü - baladır. Yarımada ealisiniñ 47%-ı aşılandı", - denile müessiseniñ matbuat hızmetiniñ beyanatında.
Daa evel ilhaq etilgen Qırımda ve Aqyarda dekabrniñ 16-sına qadar bir milliondan çoq adam gripp hastalığından aşılanğanı bildirile edi.
Aynı zamanda, idare, yarımadada keskin respirator virus hastalıqlarnıñ seviyesi epidemiya seviyesine barmağanı qoşa.
Qırımda dekabrniñ başında Rospotrebnadzor keskin respirator virus hastalıqlarnıñ artmasını qayd etken edi.
Daa evel bildirile edi ki, yarımadada bu yıl gripp hastalığınıñ yüksek seviyesi tahmin etile edi. Qırım ve Aqyarda sentâbrde aşılav kampaniyası başlandı.
