Aqmescit ve Yalta tükânlarında sakinler çoq qala bilecek azıq mallarını satın ala. Bu aqta Qırım.Aqiqat mühbirleri bildire.
Aqmescitte kürpe, makaron, konserva ve kenef kâğıtını alalar. «Metro» ve «Aşan» ağlarınıñ tükânlarında ve «Pud» tükânında nevbetler ve boş raflar qayd etildi.
Mesken yerlerindeki tükânlarda ise çoq insan yoq ve mallar şimdilik yete.
Qırım.Aqiqat mühbiriniñ bildirgenine köre, Yalta tükânlarında sakinler çoq turacaq azıq mallarını ala.
Moskovskaya soqağındaki «Pud» tükânında saat 18.00-da qarabuğday kürpesi qalmadı. Diger kürpeler – pirnik, arpa, tüy – çoq bar. Makaronlar da bar.
Spirtli sılaq yavluqlar ise yoq – tek bala ve spirtsiz soyları qaldı.
«Pud» alıcıları balıq konservaları ve ösümlik yağını çoq ala. Buña oşağan vaziyet «Bakaleya» bazasında da köründi.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlandı. Koronavirus yuqunçınıñ pandemiyası sebebinden mektep ve bala bağçalarını qapatmağa daa planlaştırmaylar.
Aqyarda martnıñ 19-ndan başlap bütün mektepler qaratıla, aliy oquv yurtları ise martnıñ 16-ndan itibaren uzaqtan oquy.
Qırımda koronavirus qayd etilgen memleketlerden kelgenler içün tevsiyeler azırlanıldı.
