İşğal etilgen Qırım sakinleri içün Ukrayina doğum şeadetnamesi alma protsedurası sadeleştirildi. Bunı Ukrayina prezidentiniñ Qırım MC-de daimiy temsilcisi Tamila Taşeva haber etti.
"Deñişmeler muvaqqat işğal etilgen topraqlarınıñ sakinlerine bu vesiqalarnıñ alınmasında yardım içün Ukrayina Yuqarı Radasınıñ insan aqları vekâletlisine muracaat etmege imkân berecek. Mezkür nizamname şahısnıñ doğumı aqqında şeadetnameniñ alınması protsedurasını sadeleştire ve advokatlarğa, salâyehiyetini tasdıqlağan vesiqa ile birlikte advokat muqavelesini taqdim etmeden muvafıq vesiqanı almağa aq bere", - dep yazıla bildirmede.
Vesiqalarnı arizacı, balanıñ anası ya da babası, çağına yetken ağası ya da tatası, emcesi, tizesi ya da notarius tarafından tasdıqlanğan vekâletname ya da "Advokatura ve advokatlıq faaliyeti aqqında" Ukrayina qanuna köre salâhiyetni tasdıqlağan vesiqa esasında areket etken temsilcisi ala bile.
Sadeleştirilgen protsedura cenk vaziyeti vaqtında ve onıñ lâğu etilmesinden soñ daa bir yıl devam etecek.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
