Qırım MC prokuraturası müessiseniñ iddia etkeni kibi, Rusiye Qara Deñiz flotunıñ 810-cı deñiz piyade brigadasında göñülli olaraq arbiy hızmetke başlağan ve Ukrayinağa qarşı cenkte iştirak etken Qırım sakinine qarşı qabaatlav aktını mahkemege yolladı.
''Qabaatlanğa şahıs 2023 senesi Rusiye Qara Deñiz flotunıñ 810-cı deñiz piyade brigadasında göñülli olaraq arbiy hızmetke başladı. Bizim Mudafaa quvetlerimizge qarşı arbiy areketlerde faal iştirak etti, hususan da Donetsk vilâyeti territoriyasında duşmannıñ vazifelerini eda etti", - dep haber ettiler matbuat hızmette.
Qırım Muhtar Cumhuriyeti prokuraturasınıñ haberinde mahkümniñ adı ve soyadı aytılmay, lâkin matbuat vastalarınen subetleşmege aqqı olmağan memur Qırım.Aqiqatqa aytqanı kibi, söz Aleksandr Brajkin aqqında kete. Bu dava boyunca onıñ açıq izaatları yoq. Onıñ qabaatı isbatlansa, Ukrayina Ceza qanunnamesiniñ 111-1 maddesiniñ 7-nci qısmı (kollaboratsiya faaliyeti) boyunca 15 yılğa qadar azatlıqtan marum etile bile.
Daa evel belli olğanı kibi, Qırım Muhtar Cumhuriyeti ve Aqyar prokuraturası Qırımnıñ 155 sakinini kollaboratsiya faaliyetinde şübeli saya.
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri - yarımadanıñ Rusiye tarafından işğaline yardım etkenlerni tapmaq ve mesüliyetke çekmek olacaq". Onıñ aytqanına köre, insanlıqqa qarşı cinayetlerni ve arbiy cinayetlerni yapqanlar, insan aqlarını bozğanlar ve genotsid kibi tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
