Qırımlı Ukrayina kirişinde işğal etilgen yarımadada berilgen Rusiye pasportını yaqtı. Bunı Ukrayina Devlet sıñır hızmeti haber etti.
"İşğalciler yarımadağa kelgende o 10 yaşında edi eken. Propagandan ve Kreml omuzdaşları 8 yıldır balanı o Rusiye vatandaşı olğanını innandırmağa tırıştılar, amma er şey nafile edi. Ukrayina ükümetiniñ nezareti altında olğan topraqlarğa kelgeninen, o, ukrayin olğanını ve işğaljiler tarafından qabul ettirilgen degil de, öz memelketiniñ vatandaşı olmağa istegenini bildirdi", - dep haber ettiler sıñırcılar.
Ukrayina Devlet sıñır hızmeti tarafından yayınlanğan videoda qırımlı RF pasportını öz isteginen degil de, Qırımnıñ işğali vaqıtnda mecburen alğanını bildirdi.
"Men Rusiye vatandaşlığından red etem", - dedi qız ve Rusiye pasportını yaqtı.
Ukrayina ve Avropa Birligi Rusiye işğal etken Qırımda berilgen Rusiye pasportlarını tanımay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
